Author: McDull

昨晚實在太攰了，十一點幾雙眼已經完全撐唔開，一上床我諗唔夠三分鐘就瞓著咗。最近唔知點解成日都係咁，好容易就攰，成日都想瞓，開工開車想瞓、收工返嚟一沖完涼又想瞓。星期二晚好開心，可以同寶寶撐枱腳，雖然食嘅嘢好簡單，都係魚頭米粉同麥片蝦，不過真係好幸福。飯後一齊計劃寶寶個企業網頁，發展我們的鴻圖大計😊😊。重新改咗個名叫做「野比家」Dora Family，好啦，等我哋一齊努力去創建這個新的家啦。回家的路上，發現隻手有啲怪怪哋，噢！原來留低咗隻介指响寶寶屋企。不過手指輕輕哋真係有啲唔慣。送咗同事去機場，返到屋企已經差唔多十二點，又好攰，一沖完涼就乜都唔想做，唯有上床瞓。今日一早同Kelvin响Papakura，佢話佢四月底就返星加坡，不過重未決定幾時返嚟，但返嚟之後就準備同我一齊去接工程自己做喎。我諗真係時間要諗諗幾時辭職啦，愈嚟愈頂唔順個經理，太小家，又唔責任，噚日佢打電話比我，要我改Work Sheet，因為Call Out嗰陣去錯地方，唔可以Claim公司喎，星期一早上七點嗰個又叫我唔好計，佢話我係咪都應該七點出門口返工。所以總共張Work Sheet 要減少五個鐘，其實錢唔係問題，原則先係問題，我真係有大清早星期六、日出去做Call Out喎，但作為一個經理係咪唔應該咁小家呢，一百幾十其實都係公司比，但佢唔比我Claim，作為員工點都係會唔開心，咁佢點令我哋服佢呢？我要開始做一啲詳細啲計劃了。寶寶，請為我禱告，我需要信心、勇氣和智慧！對神的信心、對工作挑戰的勇氣和分辦對錯的智慧。

今日終於天色放晴，但心情極之唔好，一早又係被電話嘈醒，On Call 到八點完，但最後一個鐘都唔放過我，六點五十五分，Priority 1 Call，Manukau Deport 十二個鏡頭唔著，唉，點解？人人 On Call最多都係一個Call，但我這個星期竟然有五個，最後一個重要响最後一個鐘。怱怱忙忙趕去，搞咗四個鐘先搞掂。之後Kelvin嚟同我食晏，去咗同慶，係最老字號嘅一間越南餐館，點咗咖喱雞飯，啲咖喱都幾好味，不個雞就老咗啲。食緊飯嗰陣，寶寶問我响邊度開工，原來係整咗的嘢想比我 。原本想早啲收工就過海，但事與願違！冇諗過之後會咁大件事……食完飯後，我問Kelvin跟住做乜嘢job，佢話今日有個車站關閉，我哋要去拆哂所有電子嘢，鏡頭、求助電話、喇叭同埋所有控制器，Kelvin話所有嘢都要拆。我哋一去到，見到個電工，佢話已經截哂所有電，所以我哋就開始剪線，包括「光纖」，之後就拆鏡頭、電話…… 三十分鐘後，有一個著住AT制服嘅人走過嚟，問我哋「邊個剪光纖架？」跟著講咗個令我哋嚇一跳嘅後果：「由這個火車站一直往南到Pokehoke所有網絡都斷哂！」同一時間，Kelvin個電話響起，Papakura急Call，話個成個站啲緊急電話都唔通，緊係唔通啦，都無哂網絡。之後公司就開始打電話嚟問到底發生咩事？跟著經理又打電話嚟問！再之後收到公司Email，叫我哋聽日一早返公司開會喎，唉，大鑊！還好，收工後收到寶寶Whatsapp，都有啲安慰。寶寶今日唔舒服，响屋企休息，唔嚟得打波。寶寶，好好休息呀，記得唔好食生冷嘢，唔係會好辛苦架。最多過幾日買雪糕比妳食，好嗎？

有冇搞錯，六點四十四分，公司手機又響，今次係Parnell Station，路上又係傾盆大雨，更慘嘅喺我一檢查發覺原來又係乜事都冇，唉。返到屋企八點幾，好攰，瞓又唔係，唔瞓又唔係，結果都係選擇再瞓一陣，晏啲返中午堂。午餐做咗個沙律，加麵豉湯。簡簡單單又應付咗一餐。之後繼續改Preschool個網頁，埋頭苦幹咗五個鐘，終於搞掂啦，感謝主！希望個客唔會再改啦。睇吓個鐘，又已經七點幾了，有啲肚餓，落去煮晚餐，煮咗上湯菜芯、薑葱炒魚片。一邊食飯一邊睇吓香港新聞，有啲擔心，如果林鄭做咗下屆特首新慘啦，希望「薯片」叔叔會當選啦，咁香港重會有返啲希望，我都可以考慮回流。其實真係有認真諗過，如果香港政治環境好一啲，咁經濟都會好返啲，咁返到香港都可以重有機會發展。「薯片」叔叔話香港依家需要嘅係「休養生息」，我諗我都好需要，而家响度都係一啲目標都冇，冇朋友，冇親人，永遠返到屋企都係一個人對住四面牆，好孤單寂寞，傷口又一直咁流血，與其係咁，不如遠離這個令人懷念而又傷心的地方。其實我真係好鐘意紐西蘭，但世事就係最愛的才能令你最傷。今晚都係早啲上床，唔知半夜三更電話會唔會響，唉！重要捱多九個鐘On Call先完。